Lianie May - Kersfees met Lianie

2009-11-18 14:30
 
Kersfees met Lianie
 
Kersfees met Lianie skop af met twee sprankelende, Afrikaanse treffers. “Sneeuman” is ‘n oulike sokkie-rock liedjie wat vir party luisteraars miskien te suikersoet sal klink, maar nes ‘n gehekelde geskenk van Ouma het dit beslis sy plek en sy tyd. Die skrywer, Johan Vorster van Eden, het weer homself oortref en as “Sneeuman” ‘n enkelplaat was, kon ons geen klagtes hê nie. Natuurlik is Kersfees vir baie families nog ‘n godsdienstige viering, en hierdie mense sal bly wees om na “Sneeuman” ‘n oorspronklike Afrikaanse kerslied te hoor, “Geskenk uit Bethlehem”, ook uit Vorster (en vennoot Sean Else) se pen.

Twee snitte in, en alles lyk nog goed.

Maar dan skakel May oor na Engels. Dis nie soseer haar aksent wat haar laat struikel nie (alhoewel dit opmerklik is), maar in haar tweede taal kan sy eenvoudig nie die emosie en persoonlikheid opwek wat ons van ‘n gehalte sanger verwag nie. Die bekende kersliedere wat sy sing word beter, meer gevoelig gesing deur mense soos Frank Sinatra, Mariah Carey en selfs ons eie Bles Bridges. As jy ‘n Kersalbum gaan uitgee, altyd maar ‘n geldmaakstorie, dan beter jy nie rondploeter nie.

Wat ‘n fantastiese Kersfees enkelplaat kon gewees het (met bonus-snit!), word maar ‘n substandaard vollengte produk. As Lianie May nóg so projek vir 2010 beplan, kan ons net hoop sy kom Januarie al aan die gang, dat ons Desembertyd iets meer substansieël, en meer Afrikaans, kan toedraai en onder die boom sit.

Is dit dan Kersfees met Lianie? Die gaste kom aan, word gegroet in Afrikaans en dan verloop die res van die gesellighede ongemaklik in Engels?

There are new stories on the homepage. Click here to see them.