Onderhoud: Kurt Darren

Kyk die video onderhoud

Vertel ons van jou eerste optrede.

Toe ek in Graad Een was het ek “Jerusalem” en “Green Green Grass of Home” gesing vir ‘n groep mense by die huis. Dit was my eerste nie-amptelike vertoning.

Ek dink my eerste amptelike vertoning was in ‘n winkelsentrum iewers. Ek het “Lady In Red” en “The Rose” vir die tannies gesing daar.

Vergeet jy ooit jou woorde as jy optree?

Natuurlik vergeet ek my woorde partykeer. Ek het vyftien CD’s uit: jy gaan elke nou en daan jou woorde vergeet. Dit gebeur nie baie nie, maar as jy in daardie oomblik vasgevang is met daardie gees van die gehoor gaan jy ‘n paar van jou woorde vergeet… maar dan help hulle jou weer reg.

Wat sou jy aan die wêreld wou verander?

Ek wens partykeer daar was geen politiek nie, want politiek meng met alles in, van musiek tot sport. En ek weet daar moet wees, want ons het regering nodig. Tog wens ek ons het nie regering nodig gehad nie, ek wens ons kon onsself regeer. Ek wens ons het net daardie kapasiteit gehad.

Ander kunstenaars noem jou as ‘n vaderfiguur vir Afrikaanse pop. Stem jy saam met hulle?

Ag, in Afrikaanse pop was ek van die begin af daar. Ek sal nie sê ek is ‘n vaderfiguur nie, maar ek dink ek het baie jong ouens gehelp op pad boontoe. Dis baie belangrik om nuwe ouens te kweek in daardie posisie in. Om Afrikaanse musiek as ‘n geheel sterker te maak moet daar nie net een of twee kunstenaars wees wat verkoop nie, daar moet ‘n hele paar wees wat verkoop.

Het jy ‘n gunsteling dorpie in Suid-Afrika om op te tree of om vakansie te hou?

Ek hou van Langebaan. Dit is my gunsteling vakansiedorp, en ek geniet dit ook om daar op te tree. Die hele land deur is daar plekke wat ek geniet.

Die mense is oral bietjie anders. Die mense van die Oos-Kaap is nie dieselfde as in die Wes-Kaap nie, byvoorbeeld. Elke plek verskil, maar elke plek het sy lekkerte.