As jy Brent Lindeque twintig jaar terug gevra het om ’n klomp mense toe te spreek, sou hy in koue sweet uitgeslaan het. Nou is daar vir hom niks lekkerder nie.
“Ek is absoluut mal, mal, mal daaroor,” sê Suid-Afrika se eie Good Things Guy, die ou wat bekend is vir die positiewe stories en goedvoelnuus wat hy met sy landgenote deel – ’n ligpunt te midde van die stortvloed slegte nuus.
“Jy weet, soveel van ons land leef eintlik in ’n konstante toestand van vrees. Mense rou oor iets wat hulle nog nie verloor het nie. As ek op ’n verhoog staan en ek vertel die gehoor van die wonderlike dinge wat Suid-Afrikaners vir mekaar doen . . . dan sien ek weer ’n glinstering in mense se oë, hoe die kinderlike hoop terugkeer dat ons nie uitmekaarval nie; dat dinge dalk oukei gaan wees . . .